Info
Młodostni na dwudnjowsku kubłansku jězbu přeprošeni
Serbskich młodostnych přeprošuje Towarstwo Cyrila a Metoda z.t. (TCM) na jězbu do Dachauwa a Mnichowa. Při tym póńdźe mjez druhim wo přesćěhanje Serbow za čas nacionalsocializma, wosebje na přikładźe zbóžneho kapłana Alojsa Andrickeho. Bus wotjědźe pjatk, 3. oktobra, w 6.00 hodź. Nawrót je za sobotu, 4. oktobra, wokoło 20.00 hodź. planowany. Předwidźane je prěni dźeń popołdnju wodźenje po Dachauskim wopomnišću koncentraciskeho lěhwa, hdźež su wjacori serbscy duchowni zajeći byli. Na pózdnim popołdnju je w klóštrje karmelitkow na teritoriju wopomnišća Boža mša skazana. Nazajtra wopytaja wobdźělnicy jězby w Mnichowje pomnik za wopory nacionalsocializma. Wo dalšu wosebitostku so TCM hišće stara. Na zažnym popołdnju so na dompuć nastaja. Jězba z přenocowanjom a zastaranjom płaći 50 eurow. Přihotowanske zetkanje budźe sobotu, 27. septembra, w 14.00 hodź. w Radworju na farje. Na jězbu přeprošeni su wšitcy zajimowani młodostni, wosebje ći, kotřiž budu lětsa do wosadneje młodźiny přiwzaći. Za to měli so woni hač do póndźele, 15. septembra, tule přizjewić. Kedźbu: Sobu jěć smědźa jeničce 40 zajimcow. Hdyž je lisćina połna, móža do dalši zajimcy do čakanskeje lisćiny zapisać.
